Enstîtuyê Kurdî yê Lozanî (IKL), sebebê salvegerayîşê newinî yê Referandumê Xoserîya Kurdistanî ra, Swîsre de, Lozan de derheqê xoserîye de konferansêk organîze kerd.
Konferans bi nameyê «Cigêrayîşê Xoserîya Kurdan û Aştîya Herêmî» 27ê êlule 2026 de, salona konferansî ya Mövenpick Hotelî de bî.
Qiseykerdoxê konferansî nê kesî bîyî: nuştox û berpirsîyarê wezaretî yê Hukmatê Herêmê Kurdistanî Dr. Salar Osman, serekê Enstîtuyê Kurdî Necat Zanyar û hetkara serekê enstîtuyî Nazile Afkhamî.
Konferans bi sirûdê neteweyî û bi hurmetê şehîdanê Kurdistanî dest pê bî. Sekreterê enstîtuyî, huqûqnas Şehmus Özdemir, bi qiseykerdişê xêrameyîşî mîsyonê Enstîtuyê Kurdî yê Lozanî ser o vinderd.
Qiseykerdoxo verên Dr. Salar Osman bî. Qiseykerdişê ey di beşan ra bî. Beşê yewinî de, tesîrê Referandumê Xoserîya Kurdistanî ser o vinderd; o tesîr hem verê cû de, hem nika de û hem zî ameyox de esto. Goreyê Dr. Salarî, gereka referandum bi yew perspektîfo hîra bêro erjnayene û tena rehendê siyasî de nêmano. Beşê dîyinî de, ey persanê beşdaran rê cewab da. Persî derheqê referandumî de bîyî.
Nazile Afkhamî qiseykerdişê xo de, weziyetê Rojhelatê Kurdistanî, hereketê cinîyan û destekê Referandumê Xoserîya Kurdistanî ser o vinderde. Goreyê Afkhamî, Kurdê Rojhelatê Kurdistanî bi hîsê yew netewe û yew welatî vejîyayî kuçeyan û destekê înan ê xoserîya Kurdistanî rê eşkera bî.
Necat Zanyarî derheqê meseleya Kurdistanî ya huqûqê mîyanneteweyî de qisey kerd. Zanyar binawanîya dewleta modern û huqûqê Neteweyê Yewbîyayeyî ser o vinderd. Qiseykerdişê ey de heqê çarenuştişê xo û heqê şaranê cayî ameyî erjnayene. Goreyê Zanyarî, Serek Barzanî bi xoserîye nameyê xo tarîxê Kurdistanî de nuşt û esteyîya neteweyan bi fikrê xoserîye dewam kena.
Konferans bi qiseykerdişanê Nvar Maley, Aso Piroti, Gul Sairan û Abdi Çadir dewam kerd. Dima beşdaran derheqê referandumî û meseleya xoserîye de fikrê xo îfade kerdî.
Konferans de di vîdeoyî ameyî musnayene.
Kurdan ra teber, kesayetê Swîsreyî zî konferans de amade bîyî.
